Aalborg Akvavit

Álaborg á Norður-Jótlandi er mikil sælkeraborg. Þar er að finna fjölmarga fyrsta flokks veitingastaði og þar hefur Aalborg Akvavit starfað frá stofnun árið 1881.

Dönum þykir ómissandi að ljúka – eða hefja! – góða máltíð á staupi af snörpum snafsi og í dag framleiðir fyrirtækið alls 14 mismundani gerðir af ákavíti og snafs.

Þess má geta til fróðleiks í þessu sambandi að íslenska orðið ákavíti er komið úr hinu skandinavíska orði akvavit, sem aftur er tökuorð frá latínu – aqua vitae –   sem merkir bókstaflega „vatn lífsins“. Ef þar er átt við lífið í jólahlaðborðum og öðrum mannfögnuðum á aðventunni er þarna réttnefni á ferð enda hressandi og beinlínis ómissandi siður í Danmörku og víðar að dreypa á ákavíti áður en sest er til borðs.

Eins og er með alla drykki eru reglur um meðlæti og framleiðslu einkum til í huga neytandans hverju sinni. Sumir kjósa að fá sér ákavíti við stofuhita úr sérríglösum á meðan öðrum finnst best að taka flöskuna beint úr frysti og dreypa á því ísköldu úr háu staupi eða skotglasi. Flestir njóta þess sem lystaukandi fordrykkjar en aðrir súpa á því með matnum því kryddin (og vínandinn!) bæta meltinguna á feitum mat – segja að minnsta kosti Skandinavar sem eru vanir vel feitum rifjasteikum til hátíðabrigða. Með síld, hinum sænska lútfiski og reyktum fiski, og sömuleiðis svínakjöti hefur það skipað sér ríka hefð og sé meiningin að halda norrænan „julefrokost“ í heimahúsi er alveg bráðnauðsynlegt að hafa kælda ákavítisflösku til taks svo hægt sé að skála fyrir hátíðinni, vinum og góðu ári framundan.