Amalaya

Flest vín reyna að skapa sér einhverja sérstöðu á markaði, en það eru ekki margir framleiðendur sem státa af víni sem er algerlega einstakt í veröldinni. Argentínska víngerðin Amalaya státar af einstakri sérstöðu – ræktunarsvæðin standa hærra yfir sjávarmáli en nokkrar aðrar vínekrur í veröldinni, eða á bilinu 1700 til 3300 metra yfir sjávarmáli. Nafnið Amalaya kemur úr máli indjánanna á þessu svæði í Argentínu og þýðir „von um kraftaverk“. Nafnið er ekki út í bláinn  enda hristu heimamenn hausinn þegar út spurðist að til stæði að hefja ræktun á vínvið á svæðinu og sögðu að til þess þyrfti á kraftaverki að halda.

Enginn hafði nokkru sinni ræktað þar vín áður, eða yfirleitt reynt að sá þar nokkrum sköpuðum hlut í jörðu, ekki einu sinni hinir fornu Inkar. Til þess var landið talið standa of hátt yfir sjávarmáli. Amalaya vínræktin er nefnilega í Cafayate dalnum í héraði sem nefnist Salta í Norð-vestur hluta Argentínu. En hinn stórhuga vínbóndi, Svisslendingurinn Donald Hess, sótti sérstaklega í þessar krefjandi aðstæður til að sjá hvaða áhrif þær hefðu á vöxt og þroska vínviðar og þrúgna. Afraksturinn er einstaklega spennandi vín.

Rauðvínin frá Amalaya eru að mestu leytu úr Malbec-þrúgunni en hvítvínin eru að stofninum til úr Torrontés-þrúgunni. Heimamenn í Cafayete héraðinu eru ekki í nokkrum einasta vafa um það hvers vegna vínræktunin hefur tekist svo vel sem raun ber vitni; það er af því Hess-fjölskyldan hefur ræktað landið af alúð og nærgætni við Móður Jörð – sem þeir kalla “Pachamama”- og hefur á móti séð til þess að jarðvegurinn er nægilega frjósamur til þess að vínviðurinn þrífst ekki bara heldur gefur af sér áhugaverð og ljúffeng vín. Þeir líta á ræktunin sem hreint og klárt kraftaverk og efist einhver um það þá minna þeir á hvað nafnið Amalaya þýðir. Sífellt fleiri sannfærast líka um kraftaverkið, ef marka má síaukinn fjölda ferðamanna sem sækir Cafayete og Amalaya heim og er þorpið og héraðið Salta orðin meðal mikilvægustu áfangastöðum ferðamanna í Argentínu.